Lauren Stock – Acorns Nurseries, Casnewydd

“Rwy’n mwynhau pob agwedd o’m swydd ac rwy’n mwynhau cael hwyl gyda’r plant”

Gall cwrdd â gofynion eich cyflogwr, rhieni a’u plant fod yn dipyn o her. Ond dyna yn union beth sydd angen i chi ei wneud pan rydych yn gweithio fel Nyrs Meithrinfa. Ac rydych angen y person cywir am swydd fel hon – rhywun fel Lauren Stock.

Datblygiad gwych

Pan gafodd ei chyfweld gyntaf am y swydd, gwnaeth Lauren sydd ag ychydig o anawsterau dysgu, argraff gref. Gwnaeth argraff ar y rheolwyr gyda’i brwdfrydedd a’i phersonoliaeth. Dwy flynedd yn ddiweddarach mae’n datblygu’n wych yn Acorns Nurseries yng Nghasnewydd, Cymru. Mae’r adborth cadarnhaol mae Lauren yn ei dderbyn yn rheolaidd am ei gwaith gan rieni a rheolwyr yn dangos ei bod yn llwyddiannus yn cwrdd ag anghenion y dyletswyddau heriol.

Stori’r cyflogwr

Ar bapur roedd Lauren i’w gweld yn ymgeisydd cryf am y swydd wag oedd yn y feithrinfa. Roedd ganddi gymwysterau gofal plant ac roedd wedi anfon cais da. Roedd , Kate Goodenough o Access Supported Employment yng Nghyngor Dinas Casnewydd wedi helpu Lauren i baratoi am y cyfweliad. Fodd bynnag, mae Chris Sheldon, Rheolwr y Feithrinfa yn credu bod angen mwy na chymwysterau i gwrdd â gofynion y swydd mewn meithrinfa. “Mae gan rhai pobl yr holl gymwysterau yn y byd ond yn dal methu rhyngweithio â phobl” meddai Chris, “Ond mae gan Lauren y gallu naturiol i ryngweithio a phobl ac mae hynny yn rhywbeth na allwch ei brynu. Mae hi’n ased i’r feithrinfa.”

Cyfnod prawf

Gwnaeth personoliaeth Lauren y gwahaniaeth er mwyn iddi gael cynnig y swydd. Ond nid y cyfweliad oedd diwedd y broses dewis, dim ond y cychwyn oedd hyn. Mae’r feithrinfa yn gweithredu cyfnod prawf o 13 wythnos sy’n rhoi’r cyfle i reolwyr a gweithwyr posibl asesu os yw swydd yn addas i’r ddau ohonynt. Roedd perfformiad Lauren cystal yn ystod ei chyfnod prawf ag yr oedd yn ystod ei chyfweliad a chafodd gynnig swydd barhaol. Dywed Chris: “Mae hi’n drylwyr iawn. Rhowch waith i Lauren ei wneud a bydd yn sicr o’i wneud. Mae hefyd yn cymryd balchder mawr yn ei gwaith. Mae gan y rhieni feddwl uchel ohoni.”

Nid yw Lauren angen unrhyw gefnogaeth benodol i wneud ei gwaith ond mae Chris yn rhoi cefnogaeth gyffredinol os bydd ei angen. Er enghraifft, mae’n sicrhau bod Lauren yn deall materion pwysig a godwyd yn ystod cyfarfodydd tîm. “Rwy’n gwneud cymaint ag y gallaf i gyfnerthu hunan hyder Lauren” meddai Chris. Os bydd angen gall Lauren hefyd gael cefnogaeth gan y ‘Supported Employment service’ o fewn Cyngor Casnewydd.

Stori’r Cyflogai

“Rwyf erioed wedi bod eisiau bod yn nyrs meithrinfa” meddai Lauren. Ac er mwyn sicrhau bod ganddi’r holl gymwysterau roedd ei hangen, astudiodd Lauren ofal plant yn y coleg cyn cwblhau cymhwyster NVQ Level 2 mewn gofal plant.

Mae chwarae yn rhan bwysig o ddatblygiad plentyn ac yn rhan bwysig o waith Lauren. Mae’n gweithio gyda chydweithiwr i gynllunio a threfnu gwahanol fathau o weithgareddau chwarae ar gyfer y plant fel ‘chwarae a baeddu’ chwarae â thywod a chwarae â dŵr. Mae hefyd yn gorfod monitro datblygiad y plant a chynhyrchu siartiau datblygiad sy’n cael eu hanfon i’r rhieni. Er ei bod yn gweithio ar draws pob oedran a gyda phob plentyn mae’n ‘weithiwr allweddol’ i ddau o blant penodol. “Mae hi’n gyfrifoldeb mawr i edrych ar ôl plentyn rhywun arall” meddai Lauren.

Bodlonrwydd mewn swydd

Mae hi’n mwynhau pob agwedd o’i swydd ond mae hi’n hoff iawn o’r rhan dysgu o’r swydd. Dywed Lauren: “Rwy’n hoffi dysgu plant. Pan rydych yn dysgu hwiangerddi iddynt, weithiau mae’r rhieni yn dweud wrthych fod eu plentyn wedi ailadrodd yr hwiangerddi gartref. Mae’n hyfryd i wybod hynny.” Mae Lauren yn mwynhau’r rhyngweithio rheolaidd mae’n cael gyda’r plant ac mae hefyd yn hoffi cwrdd â’r rhieni yn y nosweithiau rhieni. Mae hefyd yn cael bodlonrwydd mawr o weld datblygiad y plant fel maent yn dysgu a datblygu.

Ers iddi ddechrau gweithio yn y feithrinfa mae Lauren wedi ychwanegu mwy o gymwysterau i’w phortffolio o gyraeddiadau ac mae hyd yma wedi cwblhau Tystysgrif Cymorth Cyntaf a Thystysgrif Glendid Bwyd. Hefyd mae ganddi’r opsiwn ar gefnogaeth gan y feithrinfa i anelu am gymhwyster lefel uwch mewn gofal plant. Fodd bynnag am nawr mae’n canolbwyntio ei hegni ar wneud ei gorau yn ei swydd.